Бөлүмүнүн суроолору жана жооптору "Контролдоочу органдардын иш-аракеттерине даттануу"
Эгерде текшерүүчү адамдын иш-аракеттери мыйзамсыз болсо же мен текшерүүнүн жыйынтыктары менен макул болбогон учурда мен даттануу бере аламбы?
Эгерде Сиз коюлган талаптарга макул болбосоңуз, анда алардын чечимдерине даттана аласыз. Текшерүүчү кызмат адамынын иш-аракеттери жана ыйгарым укуктуу органдын чечими Кыргыз Республикасынын мыйзамдарында белгиленген тартипте жогору турган ыйгарым укуктуу органга, прокуратура органына же түздөн-түз сотко даттанылышы мүмкүн.
Текшерүүнүн жүрүшүндө укук бузуулар аныкталып, мага айып салынган. Мен ага макул болбой жогору турган ыйгарым укуктуу органга даттануу бергем. Менин даттануум каралып жатканга чейин мен салынган айыпты төлөөгө милдеттүүмүнбү?
Эгерде мыйзамда белгиленген тартипте ишкер тарабынан даттануу берилсе, анда даттанылып жаткан чечимдин аткарылышы токтотула турат. Демек, даттануу боюнча чечим кабыл алынганга чейин же соттун чечими (эгерде сотко кайрылса) болмоюнча текшерүүчү орган даттанылып жаткан айыптын төлөнүшүн талап кылууга укуктуу.
Мен текшерүүнүн жыйынтыктарына макул эмесмин. Мен даттануу бере аламбы? Ал үчүн мен эмне кылышым керек?
Ооба, Сиз жазуу жүзүндө даттануу бере аласыз. Жазуу жүзүндөгү даттанууда төмөнкүлөр көрсөтүлүүгө тийиш:
- региондук башкармалыктардын биринин кызматкерлери тарабынан текшерүү жүргүзүлгөн учурда региондук башкармалыктын аталышы же чечими, аракети же аракетсиздиги даттанылып жаткан инспектордун кызмат орду (белгилүү болсо) жана аты-жөнү;
- Сиздин аты-жөнүңүз же Сиздин уюмдун аталышы;
- Сиздин жашаган же турган жериңиз же жооп жөнөтүлө турган почтанын дареги;
- даттанылып жаткан чечимдин маңызы, аракеттер же аракетсиздиктер;
- ушунун негизинде Сиз даттанылып жаткан чечим, аракет же аракетсиздик менен Сиздин укугуңуз жана эркиндигиңиз бузулуп, аларды ишке ашырууга тоскоолдуктар жаралып же болбосо кандайдыр бир милдет мыйзамсыз жүктөлдү деп эсептеген жагдайлар.
Мен жүйөөлүү себептерден улам белгиленген мөөнөттө даттануу берүүгө жетишпей калдым. Менде даттануу берүүгө мүмкүнчүлүк барбы?
Ооба, мүмкүнчүлүк бар. Жүйөөлүү себептерден улам мөөнөт өтүп кеткен учурда ал калыбына келтирилиши мүмкүн.
Мен инспекцияга экинчи ирет даттануу жөнөткөм. Жакында эле менин экинчи жолку даттануум каралбай тургандыгы тууралуу билдирүү алдым. Менин даттануумду карабай коюуга укуктары барбы?
Эгерде даттанууда мурда жөнөтүлгөн даттанууларга байланыштуу маңызы боюнча жазуу жүзүндө жооптор бир нече ирет берилсе жана мында даттанууда жаңы далилдер же жагдайлар келтирилбесе, инспекциянын же региондук башкармалыктын жетекчиси кезектеги даттануунун негизсиздиги жана бул маселе боюнча арыз ээси менен кат алышууну токтотуу жөнүндө чечим кабыл алууга укуктуу, мында аталган даттануу жана мурда жөнөтүлгөн даттануулар бир эле мамлекеттик контролдоочу органга (кызмат адамына) жөнөтүлүшү шарт. Бул чечим тууралуу жазуу жүзүндө арыз ээсине билдирилет.