Бөлүмүнүн суроолору жана жооптору "Текшерүүлөрдүн жыйынтыктарын тариздөө тартиби"

Текшерүүнүн жыйынтыгы боюнча ыйгарым укуктуу органдын текшерүүчү кызмат адамы тарабынан белгиленген формадагы эки нускада акт түзүлөт.

Актыда төмөнкүлөр көрсөтүлөт:

• акт түзүлгөн дата, убакыт жана жер;
• ыйгарым укуктуу органдын аталышы;
• текшерүү жүргүзүүнү негиздеген тескеменин (буйруктун, жазма буйруктун) датасы жана номери;
• текшерүү жүргүзгөн адамдын (адамдардын) аты-жөнү, кызматтык күбөлүктөрүнүн номери жана кызмат орду;
• текшерилүүчү ишкердик субъектинин аталышы жана дареги же жеке ишкердин аты-жөнү;
• текшерүү жүргүзүүнүн датасы, убактысы жана орду;
• текшерүүнүн жыйынтыктары, анын ичинде аныкталган укук бузуулар жөнүндө маалыматтар;
• ишкердик субъектинин өкүлүнүн же жеке ишкердин текшерүүнүн жыйынтыктары менен таанышкандыгы же таанышуудан баш тарткандыгы жөнүндө маалыматтар, алардын колдору;
• текшерүү жүргүзгөн текшерүүчү кызмат адамынын колдору.

Актынын бир нускасы тиркемелердин көчүрмөлөрү менен ишкердик субъектинин жетекчисине же башка ыйгарым укуктуу өкүлүнө тилкат алуу менен тапшырылат же почта байланышы аркылуу жөнөтүлөт.

Текшерүүнүн жыйынтыктарына карабастан актыга текшерүүчү, ишкердик субъектинин жетекчиси же ыйгарым укуктуу башка өкүлү кол коет.

Актыда баяндалган фактыларга макул болбогон учурда ишкердик субъектинин жетекчиси же анын ыйгарым укуктуу өкүлү актыга кол коюуга жана каршы пикирлери жөнүндө жазып коюуга милдеттүү. Каршы пикирлердин жүйөсүн түшүндүрүүчү жазуу жүзүндөгү түшүндүрмөлөр менен документтер ишкердик субъекти тарабынан ыйгарым укуктуу органдарга акт алынган учурдан тартып 10 күнгө чейинки мөөнөттө жөнөтүлөт.

Текшерүүчү кызмат адамы тарабынан укук бузуулар аныкталган учурда Кыргыз Республикасынын административдик жоопкерчилик жөнүндө мыйзамында каралган тартипте протокол түзүлөт.